Mit wie getânen êren man die geste enphie! 730

si dûhte, daß vrou Kriemhilt vroun Prünhilde nie

sô rehte wol enphienge in Burgunden lant.

die eß ie gesâhen, den wart vil hôher muot bekant.

Nu was ouch komen Sîvrit mit den sînen man. 731

man sach die helde wenden wider unde dan

des veldes allenthalben mit ungevüegen scharn.

dringen unde stouben kunde niemen dâ bewarn.

Dô der wirt des landes Sîvriden sach 732

und ouch Sigmunden, wie güetlîch er sprach!