Er heteß widerrâten, wan daß Gêrnôt 1452
mit ungevüege im alsô missebôt.
er mant in Sîvrides, vroun Kriemhilde man:
er sprach: ‚dâ von wil Hagene die grôßen hovereise lân.‘
Dô sprach von Troneje Hagene: ‚durch vorhte ich niht entuo. 1453
swenne ir gebietet, helde, sô sult ir grîfen zuo:
jâ rîte ich mit iu gerne in Etzelen lant.‘
sît wart von im verhouwen manec helm unde rant.
Diu schif bereitet wâren den künegen und ir man; A.1454
swaß si kleider hêten, diu truoc man dar an.