der sluog er etelîchem sô swæren swertes swanc,
daß si durch die vorhte ûf hôher muosen stân.
eß het sîn starkeß ellen vil michel wunder getân.
Âventiure
wie Dancwart diu mære ze hove sînen hêrren brâhte.
Alsô der küene Dancwart under die tür getrat, 1888
daß Etzeln gesinde er hôher wîchen bat.
mit bluote was berunnen alleß sîn gewant;
ein vil scharfeß wâfen truog er blôß an sîner hant.