CHARACTER SPECIFICUS.
Erica, antheris aristatis inclusis, foliis quaternis obtusissimis margine cartilagineis, corollis terminalibus ternatis campanulatis trilinearibusque.
DESCRIPTIO.
Suffrutex pygmæus, humifusus, inter rupes.
Caulis sub-trientalis, ramosus, ramulis divaricatis et decumbentibus.
Folia quaterna, conferta, patula, linearia, at latiuscula et crassiuscula, obtusissima, lucida, marginibus, præcipue ad lentem, cartilagineis, subtus sulcata.
Flores terminales, plerumque ternati, nutantes, vel cernui, vel subinde erectiores; pedunculi longitudine corollæ, rubri, bracteis tribus alternis muniti.
Calyx tetraphyllus, foliolis adpressis, sublanceolatis, obtusissimis, obtuseque carinatis, marginem versus membranaceis.
Corolla campanulata, alba, laciniis semirotundis, patentibusque.
Stamina octo, capillaria; antheræ barbatæ, inclusæ.