And lang, lang may the maidens sit,
With their goud kaims in their hair,
A’ waiting for their ain dear loves!
For them they’ll see nae mair.
Half ower, half ower to Aberdour,
’Tis fifty fathoms deep,
And there lies gude Sir Patrick Spens,
Wi’ the Scots lords at his feet!
HAME, HAME, HAME
Hame! hame! hame! O hame fain wad I be!
O hame, hame, hame to my ain countrie.
When the flower is in the bud, and the leaf is on the tree,
The lark shall sing me hame to my ain countrie.
Hame, hame, hame! O hame fain wad I be!
O hame, hame, hame to my ain countrie!
The green leaf o’ loyalty’s beginning now to fa’;
The bonnie white rose it is withering an’ a’;
But we’ll water it with the blude of usurping tyrannie,
And fresh it shall blaw in my ain countrie!
Hame, hame, hame! O hame fain wad I be!
O hame, hame, hame to my ain countrie!
O, there’s nocht now frae ruin my countrie can save,
But the keys o’ kind heaven, to open the grave,
That a’ the noble martyrs wha died for loyaltie
May rise again and fight for their ain countrie.
Hame, hame, hame! O hame fain wad I be!
O hame, hame, hame to my ain countrie!
The great now are gane, who attempted to save;
The green grass is growing abune their graves;
Yet the sun through the mirk seems to promise to me
I’ll shine on ye yet in your ain countrie.
Hame, hame, hame! O hame fain wad I be!
O hame, hame, hame to my ain countrie!
BORDER BALLAD
A LYKE-WAKE DIRGE
This ae nighte, this ae nighte,
Every nighte and alle,
Fire and sleet and candle-lighte,
And Christe receive thy saule.