“You onduhstan’ ’bout cook en’ wash, enty?”
“Yaas, suh, uh well acquaintun wid alltwo.”
“Berry well. You know how fuh patch man’ britchiz en’ t’ing?”
“No, suh, uh know how fuh patch ’ooman’ frock, but uh yent know nutt’n’ ’bout no britchiz ’cause none ent fuh dey een we house.”
“You hab Pa, enty?”
“No, suh, uh yent hab no Pa. Uh yeddy ’bout’um but uh nebbuh shum. Grumma tell me suh one time uh bin hab Pa, but Ma run’um off en’ ’e ’f’aid fuh come back, en’ attuhw’ile w’en uh biggin fuh grow big, Ma sen’ me fuh lib ’long Grumma, ’cause ’e say suh uh tek attuh Pa ’tell eb’ry time ’e look ’puntop me ’e bex ’tell him haffuh lick me, en’ him say suh ’e yent hab time fuh fuhrebbuh duh lick me.”
“You tek attuh yo’ Pa, enty?”
“Yaas, suh, uh nebbuh shum, but eb’rybody say suh uh look luk’um en’ tek attuhr’um alltwo.”
“You ent tek attuh yo’ Ma, iz you?”
“No, suh, uh yent tek attuh him.”