“Yaas, enty uh tell wunnuh ’e plant nine t’ous’n’ acre’ rice? Wunnuh t’ink me duh lie, enty? Uh swaytogawd, w’en uh bin Cumbee one time uh count fo’ t’ous’n’ head uh nigguh’ duh hoe rice een de baa’nyaa’d fiel’. Nigguh’ stan’ een Mass Clinch’ fiel’ sukkuh crow’ duh mustuh! En’ him hab seb’n hund’ud mule’!”
“De mule’ wu’k ’pun Cumbee?” asked an iconoclast.
“Co’se de mule’ wu’k, en’ de nigguh’ wu’k, en’ Mistuh Jokok wu’k. Eb’rybody wu’k ’scusin’ my maussuh. Dem mule’ hab long tail’ dull summuhtime fuh switch fly, but w’en wintuhtime come en’ dem ’leb’n hund’ud mule’ tail’ roach, de pyo’ hair wuh shabe off’um mek one pile stan’ big mo’nuh rice rick!”
“Hukkuh yo’ maussuh plant all dat rice en’ t’ing’ ef ’e yent wu’k?”
“Enty I tell wunnuh him lib een Walterburruh? Duh summuhtime ’e does dribe duh plantesshun now en’ den fuh see how him crap stan’. Him dribe two hawss’, en’ de buckle on ’e haa’ness shine lukkuh gol’. One nigguh duh seddown behine ’e buggy wid alltwo ’e han’ fol’ befor’um lukkuh hog tie. Mass Clinch hab on one kid glub ’pun ’e han’ wuh come to ’e elbow. W’en ’e git Cumbee, ’e light out ’e buggy. T’ree nigguh’ run up fuh hol’ ’e hawss’ head. Mistuh Jokok mek’um uh low bow. Mass Clinch iz uh berry mannussubble juntlemun, alldo’ him iz quality, en’ him ’spon’ to de bow. Den ’e biggin fuh walk. Him hab shishuh rich walk! Den ’e cock ’e hat one side ’e head. You nebbuh see nobody kin cock ’e hat stylish lukkuh Mass Clinch. Den ’e onbutt’n ’e weskit. ’E pit ’e lef’ han’ een ’e britchiz pocket, en’ swing ’e walkin’ stick een ’e right han’, en’ biggin fuh quizzit him ob’shay. By dis time ’e git ’puntop de baa’nyaa’d hill en’ look obuh ’e fiel’.
“‘Jokok’,” ’e say, “‘dat de stretch flow you got on my rice, enty?’”
“‘No, suh, dat de haa’bis’ flow.’”
“‘De debble’!” ’e say. “‘’E mus’ be mos’ time fuh ricebu’d!’”
“‘Yaas, suh. We gwine hab some fuh dinnuh’.”
“‘Wuh else you got fuh eat?’” Maussuh quizzit’um.