Ao. viij. Hen. V.—“And the xx day of Maij the yere of oure lord ml cccc xxti the kyng come to Troys in Champayne, where he was worthely receyved of al the lordes spiritual and temperal that were with the kyng of Fraunce. And upon the morue the kyng and quene of Fraunce, and dame Katerine his sustre, the duke of Burgoyne metten togiders in seint Petres chirche of Troys, in the body of the same chirch; and after went thei up to the high auter, and there tharticles of the peas redde, and the othes made on either partie: and than was the kyng and dame Katerine sured togiders. And upon the morue after Trinity Sonday, that was than the iijd day of Juyn, the yere of our lord m iiijc and xx, in the chirch of seint Petre of Troys the kyng weddid dame Katerine, kyng doughter of Fraunce, and was made regent of Fraunce. The convencions of which accord followen here after, that is to say.”
[Then follows the agreement, which extends to nearly eleven folios.]
“And thanne after that the fest and solempnetie of the mariage was done, the kyng conquerid many townes and castells. Also the kyng leid his sege to Milon sur Seyne, duryng which sege the maire and shireves of London were chosen.”
Note LL. [page 108].
Ao. viij. Hen. V.—“And whanne the solempnite was done in the chirch, she was brought ful worthely into the greet halle.
Of the sittyng of the astates at the coronacion of Quene Kateryne hereafter foloweth: that is to say;
First Quene Kateryne sate in hire astate.
The archebisshop of Caunterbury.
The bisshop of Wynchestre.
Thei saten upon the right side of the Quene, and served next the Quene, and covered at every course.