played sic a ploy; but deil fetch me if I dinna lift it as weel as he did!’ Sae aff he gaed, for there wasna sic a man for birr in a’ the countra, an’ he kent it as weel, for he never met wi’ his match. Weel, he tried, and tugged, and better than tugged at the stane, but he coudna mudge it ava; an’ when he looked about, he saw a man at his ilbuck, a’ smeared wi’ smiddy-coom, snightern an’ laughin’ at him. The laird d---d him, an’ bade him lift it, whilk he did as gin ’t had been a little pinnin. The laird was like to burst wi’ rage at being fickled by sic a hag-ma-hush carle, and he took to the stane in a fury, and lifted it till his knee; but the weight o ’t amaist ground his banes to smash. He held the stane till his een-strings crackit, when he was as blin’ as a moudiwort. He was blin’ till the day o’ his death,—that’s to say, if ever he died, for there were queer sayings about it—vera queer! vera queer! The stane was ca’d Mauns’ Stane ever after; an’ it was no thought that canny to be near it after gloaming; for what says the Psalm—hem!—I mean the sang—
’Tween Ennetbutts an’ Mauns’ Stane
Ilka night there walks ane!
“There never was a chief of the family after; the men were scattered, an’ the castle demolished. The doo and the hoodie-craw nestle i’ their towers, and the hare mak’s her form on their grassy hearth-stane.”
“Is this stone still to be seen?”
“Ou, na. Ye see, it was just upon Johnie Forbes’s craft, an’ fouk cam’ far an’ near to leuk at it, an’ trampit down a’ the puir cottar-body’s corn; sae he houkit a hole just aside it, and tumbled it intil ’t; by that means naebody sees’t noo, but its weel kent that it’s there, for they’re livin’ yet wha’ve seen it.”
“But the well at the Abbey—did no one feel a desire to enrich himself with the gold and silver buried there?”
“Hoot, ay; mony a ane tried to find out whaur it was, and, for that matter, I’ve may be done as foolish a thing myself; but nane ever made it out. There was a scholar, like yoursel’, that gaed ae night down to the Abbey, an’, ye see, he summoned up the deil.”
“The deuce he did!” said I.
“Weel, weel, the deuce, gin ye like it better,” said he. “An’ he was gaun to question him where the treasure was, but he had eneuch to do to get him laid without deaving him wi’ questions, for a’ the deils cam’ about him, like bees biggin’ out o’ a byke. He never coured the fright he gat, but cried out, ‘Help! help!’ till his very enemy wad hae been wae to see him; and sae he cried till he died, which was no that lang after. Fouk sudna meddle wi’ sic ploys!”
“Most wonderful! And do you believe that Beelzebub actually appeared to him?”