Egregiam de te spem, Joannes ornatissime, tuis et cognatis et patriæ, non solum moribus, imo et benefactis, te velle nobiliter ostendere, nunquam (opinor) tu prætermittes neque desistes. Quo tu Reipubl. vel consilio prodesses, curasti ut per me Quintilianus emendatior caracteribus et impressioni daretur bellissime. Multis exemplariis diligenter collatis, unum (mendis pene innumerabilibus deletis) castigatissimum non pigra manu feci; ipsum, ut jussisti, a Parrhisiis Lugdunum misi. Utinam et qui impriment novos non superinducant errores. Vale, et me ama.

Parrhisiis, apud collegium Plesseiacum, tertio calendas Martias.

B

Imbutam ausonia cupiens me reddere lingua

Artibus et pariter me decorare bonis,

Nocte dieque docens pater ut charissimus, ipse

Fundamenta mihi dulcia et ampla dabat.

C

MONITOR. Hanc tibi quis struxit gemmis insignibus urnam?

AGNES. Quis? Meus in tali nobilis arte pater.