nunc tandem fruitur votis atque omne futurum
te Romae seseque tibi promittit in aevum.
Hinc te iam patriis laribus via nomine vero
sacra refert. flagrat studiis concordia vulgi,
quam non inlecebris dispersi colligis auri; 605
nec tibi venales captant aeraria plausus
corruptura fidem: meritis offertur inemptus
pura mente favor. nam munere carior omni
obstringit sua quemque salus. procul ambitus erret!
non quaerit pretium, vitam qui debet amori. 610