Non semper clipei metuendum gentibus orbem
dilecto studiosa parens fabricabat Achilli,
Lemnia nec semper supplex ardentis adibat
antra dei nato galeam factura comantem,
sed placidos etiam cinctus et mitia pacis 5
ornamenta dabat, bello quibus ille peracto
conspicuus reges inter fulgeret Achivos.
ipsa manu chlamydes ostro texebat et auro,
frenaque, quae volucrem Xanthum Baliumque decerent,
aequore quaesitis onerabat sedula gemmis. 10