And of Paaris remenbre yow among.
Because that Paryis hadde dremed that he shulde ravysch Helayne in Grece, a grete army was made and sent ffro Troye into Grece, where that Paryis ravysshede Heleyne. Than for that wrongfull dede they com after that opon Troye with all the power off Grece. There was soo grete a covnetre at that tyme that it lastyd to the contre that we calle now Puille[[420]] and Calebre in Ytaly, and that tyme it was called Lytyl Grece.[[421]] And of that contre was Achilles and þe Mirmedewes, the which were so worthi fyters. That grete quantite of pepill confoundid Troye and all the contre. Therefor it is seyde to the good knyght that he shulde not ondirtake to doo no grete thynge opon avysiones, for grete harme and grete besynes may come thereoff. And that a grete emprise shuld not be done wythowte good deliberacion of counsell, Platon seyth, “Do nothyng,” seith he, “but that thy wytte hath ouerseen afore.”
That a grete empryse shuld not be takyn for avisyon, that is to sey that the good sperite shulde in no vyse presume ne reyse hym selphe in arrogance for no maner of grace that God hath yoven hym. And Seynt Gregorie seyth in his Morales that there be .iiii. spices[[422]] in the whiche all bolnynges of arrogances be shewed. The fryst is when they noyse they haue of them selfe the goodnes that they haue; the .ii. is when they wene welle that they haue deseruyd and reseyuyd it for ther meritis the goodnes þat they haue; the .iii. is when they avant to haue the goodnes that they haue not; and the .iiii. is when that they dysprese othir and desire that men shuld know the goo[d]nes that is in theyme. Ayens this vyse the wyse man spekyth in his Prouerbes, [“Arrogantiam et superbiam et os bilingue detestor”].[[423]]
LXIX.
Iff thou loue well houndes an birdes, than
On Anteon,[[424]] the fayre yong gentilman,
The which becomme an herte, vmbethynk well þe,
And loke that siche fortune com not to the.
Antheon was a full corteis ientylman and of gentyl condicions |f. 50.| and loued houndes and birdes to myche; fore the fabill seith that on a day as he huntyd all alone in a thykke forest, wheryn his men hadde lost hym, thane as Dyane the godesse of the woode hadde huntyd in the forest to it was the oure of noone, she was sore chaffede and hoote for the grete hete of the sunne, for þe which she had a lyste to bathe hir in a f[a]yre welle and a clere, the whiche was ther fast by, and as she was in the welle all nakyde envyrouned wyth fayreis[[425]] and godes the whiche seruyd hyre, Antheon, the which tooke non heede, com sodeynly opon hire and sawe all the godes, of whome for hire grete castite the vesage wexe reede for shame and was full sory. And than she seide, “Becawse that I know wele that thysse yong gentilman wyll vaunt hym of ladies and gentilwomen—to the entent that thou schalte not mowe vante the that hathe see me naked, I shall take the myght of thy speche from the.” Than she cursyd hym, and anon Antheon becomme a wilde herte and no thyng was lefte hym of mankyndly shape but all only vndirstondyng. Than he, full of grete sorowe and off sodeyne feere, wente fleyng throwe the busches, and anon he was reseyuyd with his owen houndes and halewed wyth hys owen men that serched the forest for hym, but nowe they haue founde hyme and knowe hym not. There Antheon was drawe doune, the whych wepte grete teres afore his owne men and fayne woolde haue cryed theyme mercy yif he myght haue spokyn. And sene that tyme hethir to hertes euer at there dethe wepyn. Antheon was slayne and martired with grete woo with his owen menye, the which in a litell while had all devowred hym. Many exposicions may be made vpon this fable; but to oure purpose it may be seide of a yong man that habaundoneth hym holy in ydylnes and dispendith his goodes and his gettynges in delyte off his body and in disportes of huntyng and to kepe ydel menye. Hereby may it be seide that he was hated of Dyane, the which is noted for chastite, and deuowred of his owen menye. Therefor it is seide to the good knyght that he shuld be ware he were not deuowred in leche wyse. And a wyse man seith, “Idilnes engendyrth idylnes[[426]] and errour.”
Be Antheon, the which become an herte, we may vnderstond the veray repentaunt man that was wonnte to be a synner and now hath ouercome his fleyssch and made it bonde to the good sperite [and] takyn the state of pennaunce. Seynt Austyn seith in the Sawtyr that pennance is an esy thyng or dede and a lyght charge; it owght not to be called a grete charge for a man but wenges off a byrde fleyng, for, as a birde in herth here bereth the charge of |f. 51.| there wenges and there wenges berith theyme to heven, on the same wyse, yff we bere on erthe here the charge off pennawnce, it shal bere vs to heven. To this purpose þe Gospell seith, [“Pœnitentiam agite, appropinquavit enim regnum cœlorum”].[[427]]