MÆRUA.
Mærua. Forsk. Arab. p. 104. Vahl symb. 1. p. 36. De Cand. Prodr. 1. p. 254.
Char. Gen. Calyx tubulosus: limbo 4-partito, æstivatione simplici serie valvata: corona faucis petaloidea. Petala nulla. Stipes genitalium elongatus. Stamina numerosa. Pericarpium (siliquiforme?) baccatum.
Frutices inermes, pube, dum adsit, simplici. Folia simplicia coriacea: petiolo cum denticulo rami articulato: stipulis minutissimis setaceis.
Mærua rigida, corymbis terminalibus paucifloris, foliis obovatis crassis rigidis aveniis nervo obsoleto, corona lacero-multipartita.
Desc. Frutex? Rami stricti teretes tenuissime pubescentes. Folia sparsa, obovata cum mucronulo brevissimo, plana semiunguicularia, utrinque pube tenuissima brevissima simplici, nervo obsoleto, venis fere inconspicuis. Petioli lineam circiter longi. Stipulæ laterales, setaceæ, petioli dimidio breviores, ramulo appressæ, post lapsum folii persistentes. Ramuli floriferi sæpius laterales abbreviati, e foliis confertis floribusque corymboso-fasciculatis (3-6.), quorum exteriores folio subtensi; quandoque corymbus ramum terminat. Pedunculi teretes, tenuissime pubescentes, ebracteati excepto foliolo florali dum adsit ejusque stipulis vix conspicuis. Calyx infundibuliformis, extus tenuissime pubescens: tubus subcylindraceus, 8-striatus striis elevatis æqualibus, intus lineis duabus prominulis subcarnosis, cum limbi laciniis alternantibus, altera crassiore: limbus tubo paulo longior, 4-partitus laciniis æqualibus, ovatis acutiusculis, obsolete venosis, 5-nerviis, nervis extimis margini approximatis, e furcatione costarum quatuor tubi cum laciniis alternantium ortis; æstivatione simplici serie valvata marginibus tamen paulo inflexis. Corona faucis monophylla, laciniis limbi multoties brevior, lacero-multipartita lacinulis subulatis inæqualibus. Stipes genitalium liber, cylindraceus, glaber, altitudine tubi. Stamina: Filamenta indeterminatim numerosa, viginti circiter, filiformia glabra, æstivatione contortuplicata. Antheræ incumbentes, ovali-oblongæ obtusæ, basi semibifidæ, loculis parallelo-approximatis, intus longitudinaliter dehiscentibus, æstivatione erectæ. Ovarium e centro filamentorum stipitatum, cylindraceum, glabrum, uniloculare placentis duabus parietalibus polyspermis. Stylus nullus. Stigma depresso-capitatum.
Obs. Species hæcce proxime accedit Mæruæ senegalensi nob. quæ vix pubescens et foliis venosis distincta; in multis quoque convenit, fide descriptionis Forskalii, cum Mærua uniflora Vahl, a nobis non visa. Mærua angolensis, De Cand. (in Museo Parisiensi visa) cui flores pariter corymbosi et corona lacero-multipartita, satis diversa est foliis ovalibus.
[98]Annal. du Mus. d’Hist. Nat. 18. p. 392.
[99]Théor. Elem. ed. 2. p. 244.