COMICAL HISTORY
OF
SIMPLE JOHN,
AND HIS
TWELVE MISFORTUNES.
Simple John was a widow’s son, and a coarse country weaver to his trade. He made nothing but such as canvas for caff-beds, corn and coal sacks, drugget and harn was the finest webs he could lay his fingers to: he was a great lump of a lang, lean lad, aboon sax feet afore he was aughteen years auld; and, as he said himsel, he grew sae fast, and was in sic a hurry to be high, that he did not stay to bring a’ his judgment with him, but yet he hoped it would follow him, and he would meet wi’t as mony a ane does after they’re married. He had but ae sister, and she had as little sense as himsel’, she was married on Sleeky Willie, the wylie weaver; his mither was a rattling rattle-scull’d wife, and they lived a’ in ae house, and every body held them as a family of fools. When John came to man’s estate, to the age of twenty-one years, he told his mither he would hae a wife o’ some sort, either young or auld, widow or lass, if they had but heads and lips, tongue and tail, he should tak them, and weel I wat, mither, quoth he, they’ll get a lumping penny-worth o’ me, get me wha will.
His mither tells him o’ the black butcher on Ti’ot-side, wha had three doughters, and every ane o’ them had something, there was Kate, Ann, and Girzy, had a hundred merks the piece. Kate and Ann had baith bastards. Girzy the eldest had a humph back, a high breast, baker legged, a short wry neck, thrawn mouth, and goggle ey’d; a perfect Æsop of the female kind, with as many crooked conditions within as without, a very lump of loun-like ill-nature, row’d a’ together, as if she had been nine months in a haggis, a second edition of crook backed Richard, an old English King, that was born with teeth to bite a’ around about him, and yet the wight gaed mad to be married.
John’s mither told him the road where to go, and what to say, and accordingly he sets out wi’ his Sunday’s coat on, and a’ his braws, and a pair of new pillonian breeks o’ his mither’s making. In he comes and tells his errand before he would sit down, says good day to you, goodman, what are you a’ doing here? I am wanting a wife, an’ ye’re a flesher, and has a gude sorting aside you, my mither says ye can sair me or ony body like me, what say ye till’t, goodman? How mony douchters hae ye? Are they a’ married yet? I fain wad tak a look o’ some o’ them gin ye like.
A wow, said the goodwife, come in by, honest lad, and rest ye, an ye be a wooer sit down and gie’s a snuff—A deed, goodwife, I hae nae mills but my mither’s, and it’s at hame.—Whare win ye, I’se no ken ye? I wat, quoth he, my name’s Jock Sandyman, and they ca’ me Simple John the sack weaver. I hae nae tocher but my loom, a pirn-wheel, a kettle, pat, a brass pan, twa pigs, four cogs, and a candlestick, a good cock, a cat, twa errocks new begun to lay; my sister Sara is married on Sleeky Willie the wylie weaver, and I maun hae a hagwife or my mither die, for truly she’s very frail, and ony harl o’ health she has is about dinner time; what say ye till’t, goodman? can ye buckle me or not?
Goodman. A dear John, ye’re in an unco haste, ye wadna hae your wife hame wi’ ye? they’re a’ there before ye, which o’ them will ye tak?
Hout, tout, says John, ony o’ them will sair me, but my mither says there is twa o’ them has fauts. And what is their fauts? says the goodwife. Hout, said John, it’s no meikle faut, but I dinna like it, they got men or they were married. And what shall I do wi’ them? said the goodman.
John. A deed, goodman, as ye’re ay dealing among dead beasts and living beasts, I wad put them awa among ither beasts, or gin ye be aun ony penny, let somebody tak them up o’ desperate debt, I sud flie the fykes frae them, they anger’d you, and sham’d you baith with their bastards, a wheen daft jades it gets men or they be married, and bairns or they get bridals.
Goodwife. A wat weel that’s true, lad.