Heit is 's 'xactly zwansig Johr,
Dass ich bin owwe naus;
Nau bin ich widder lewig z'rick
Un schteh am Schulhaus an d'r Krick,
Juscht neekscht an's Dady's Haus.
Ich bin in hunnert Heiser g'west,
Vun Marbelstee' un Brick,
Un alles was sie hen, die Leit,
Dhet ich verschwappe eenig Zeit
For's Schulhaus an der Krick.
* * * * * * *
Der Weisseech schteht noch an der Dhier—
Macht Schatte iwwer's Dach:
Die Drauwerank is ah noch grie'—
Un's Amschel-Nescht—guk juscht mol hi'—
O was is dess en Sach!
* * * * * * *
Do bin ich gange in die Schul,
Wo ich noch war gans klee';
Dort war der Meeschter in seim Schtuhl,
Dort war sei' Wip, un dort sei' Ruhl,—
Ich kann's noch Alles sch'.
Die lange Desks rings an der Wand—
Die grose Schieler drum;
Uf eener Seit die grose Mad,
Un dort die Buwe net so bleed—
Guk, wie sie piepe rum!
* * * * * * *
Oh horcht, ihr Leit, wu nooch mir lebt,
Ich schreib eich noch des Schtick:
Ich warn eich, droll eich, gebt doch Acht,
Un memmt uf immer gut enacht,
Des Schulhaus an der Krick!