108. Ung grant chasteau d'argent assis sur boiz, bien ouvré et doré en plusieurs lieux, à trois tours principales, garni tout à l'entour de murailles d'argent, avec six tournelles estans sur chacune desdites tournelles ung homme arme tenant baston de deffence. Et iiii pilliers estans emprez les deux grans portes et a sur ung chacun desdits pilliers ung enfant nuz tenant trompettes et autres instrumens. Et devant la première grande porte a ung serpent doré à trois testes, dessus lequel est assis ung petit enfant nuz, jouent d'instrument, avec seze personnaiges, que petitz que grans, estans dedans ledit chasteau et au-dessus du donjon a une marguerite sur laquelle est une femme tenant ung pot sur sa teste.
Riches tableaux de Painctures et aultres estans a ladite seconde Chambre a chemynée.
109. Premier: ung tableau de la portraiture de feu MS. de Savoie, mary de Madame, que Dieu pardoint, habillé d'une robbe de velours cramoisy fourée de martre, prepoint de drapt d'or et séon de satin brouchier, tenant une paire de gand en sa main, espuez sur une coussin.
(On lit en marge cette remarque écrite d'une autre main et d'une autre encre:) Donné par ordre de madite dame à la doucesse de Hocstrat.
110. Ung aultre tableau d'une Lucresse, habillé d'une robbe d'homme fourée de martre ayant une chayne d'or au col, le fond du tableau noir.
111. Ung aultre petit tableau de Nostre Dame en chief où est la représentation de l'empereur moderne et de Madame à genoux, adorant ladite ymaige dessus ung blason aux armes d'Espaigne et de Bourgogne et quatre blasons ès quatre coins.
(On lit en marge:) Délivré par ordonnance de madite dame à son aulmosnier.
112. Ung aultre tableau de ecce homo ung escripteau pendu au col et petitz anges en chiefs, tenant en une main ung fouet et verges et en l'autre une canne, le fond rouge. (En marge:) Délivré aux prieurs et religieux du couvent de Broux, comme il appert cy-après folio vi vii et les quatres ensuivants. (Voir nos [113,] [114,] [115,] et [116.] Ces cinq tableaux se retrouvent sur l'inventaire du mobilier de l'église de Brou, dressé en 1659.)
113. Ung aultre tableau de Nostre Seigneur, fait après le vif, et plusieurs lettres d'or à l'entour dudit tableau. Ledit tableau couvert de verre.