"Ev'yt'ing wuks togeddah fuh dem dat truss in de Lorrd. Oi'll manage somehow. Oi'll scratch meself togeddah. De lil' bit o' money Oi get fum de house an' de piece o' lan' will jus' buy me an' Gerald ticket. Now all Oi is axin' yo' fo' do is put up de show money. Oi ent wan' no mo'. Dah is anuff. An' as de Lord is in heaven Oi'll pos' it back tuh yo' when the boat land at Colon."
"An' wuh yo' gwine do wit' de chirrun, ni, Sarah? Wuh yuh gwine do wit' dum?"
"Oi got Rosa fuh look aftah dem fo' me, bo. Yo' know Peony is wid she evah sense de holliduhs, an' she don't even wan' fuh come way, de ownway t'ing. But, yo' know, Charlie, Oi can't blame de chirrun, ni. Um ent nutton home fuh duh. Rosa is berry well satified fi' hav' she, aldo me can't say she ah happy riddance. No, not at all. Well, an de uddah gyrls, it gwine be ha'd 'pon dem, but Rosa house on Coloden Road is big enough fee tek cyah ah all uh dem, an' Mistah Foyrd only come home once a mont'. Rosa so lonesome, an' she so like de picknee dem. She will tek cyah uh dem fuh muh till Oi sen' back fuh dem. An' Oi only takin' Gerald wit' muh, po' fellah."
"Oi gotto go," she went on, in a hollow, dejected voice, "an' see wha' de mattah wit' Lucian. Oi can' go 'long tyin' mi guts no mo'. Oi too tired."
"Hey, but dah is a beast uv a man fuh yo', ni!" muttered Oxley in incredible outrage.
"Yo' know, sometimes Oi t'ink he muss be sick—"
"Sick?" he flew up, like a hen striking at a mongoose. "Dah man sick? Gyrl, hush up yuh mout'! Dah man sick? He ent sick no 'way! If he was sick doan yuh tink de nurse in de horspitral can write a letter even fuh a shillin' fuh he? Gyrl, go talk sense, ni! Dah man ent sick. He is jess a wufless stinkin' good fuh nutton vargybin' who ent learn fuh tek cyah uh he fambaly, dah is wuh he is! Oi tell yuh 'bout dese fancy mud-head men! Ent a blind one o' dem any blasted good! A pack o' rum-drinkin', skirt-chasin' scoundrels—dah's wuh duh is! Dey ort tuh lock he up, dey ort tuh get he 'n roast he behind fuh he—"
"Charlie!"
"Wha' Oi doin'? Ent um is de troot, ent um?"