Sit satis, et nunquam successu crescat honestum?
Scimus; et hoc nobis non altiùs inseret Ammon.
Hæremus cuncti Superis, temploque tacente,
Nil facimus non sponte Dei: nec vocibus ullis
Numen egit: dixitque semel nascentibus auctor
Quicquid scire licet; steriles nec legit arenas
Ut caneret paucis, mersitque hoc pulvere verum.
Estne Dei sedes, nisi terra, et pontus, et aër,
Et cœlum, et virtus? Superos quid quærimus ultrà?
Juppiter est quodcunque vides, quocumque moveris!