Nulla quies intus, nullaque silentia parte.
Nec tamen est clamor, sed paruae murmura uocis;
Qualia de pelagi, si quis procul audiat, undis
Esse solent; qualemue sonum, cum Iupiter atras
Increpuit nubes, extrema tonitrua reddunt.
Atria turba tenet; ueniunt leue uulgus, euntque;
Mixtaque cum ueris passim commenta uagantur
Millia rumorum, confusaque uerba uolutant.
E quibus hi uacuas implent sermonibus aures;
Hi narrata ferunt alio; mensuraque ficti