"That portion o' the Word maun be o' leemited application, I doot," returned Marget, as, withdrawing her hand from her cousin's, she turned again to the pot hanging over the fire. "No man daurs to say that my han' has not been the han' o' the diligent; but Guid kens I'm nane the richer."
"We maunna repine, Marget. Richt or wrang, it's the Lord's will."
"It's easy to you, Robert Bruce, wi' yer siller i' the bank, to speik that gait til a puir lone body like me, that maun slave for my bread whan I'm no sae young as I micht be. No that I'm like to dee o' auld age either."
"I haena sae muckle i' the bank as some folk may think; though what there is is safe eneuch. But I hae a bonny business doun yonner, and it micht be better yet. It's jist the land o' Goshen, only it wants a wheen mair tap-dressin'."
"Tak it frae the bank, than, Robert."
"The bank! said ye, Marget? I canna do that."
"And what for no?"
"'Cause I'm jist like the hens, Marget. Gin they dinna see ae egg i' the nest, they hae no hert to lay anither. I daurna meddle wi' the bank."
"Weel, lat sit than; an' lay awa' at yer leisur'. Hoo's the mistress?"
"No that weel, and no that ill. The faimily's rather sair upo' her. But
I canna haud her oot o' the chop for a' that. She's like mysel'—she
wad aye be turnin' a bawbee. But what are ye gaein to do yersel',
Marget?"