There cam a man to oor toon-en',
An' a waesome carl was he;
Wi' a snubbert nose, an' a crookit mou',
An' a cock in his left ee.
And muckle he spied, and muckle he spak';
But the burden o' his sang
Was aye the same, and ower again:
There's nane o' ye a' but's wrang.
Ye're a' wrang, and a' wrang,
And a'thegither a' wrang;
There's no a man aboot the town,
But's a'thegither a' wrang.
That's no the gait to bake the breid,
Nor yet to brew the yill;
That's no the gait to haud the pleuch,
Nor yet to ca the mill.
That's no the gait to milk the coo,
Nor yet to spean the calf;
Nor yet to fill the girnel-kist—
Ye kenna yer wark by half.
Ye're a' wrang, &c.
The minister was na fit to pray,
And lat alane to preach;
He nowther had the gift o' grace,
Nor yet the gift o' speech.
He mind 't him o' Balaam's ass,
Wi' a differ ye may ken:
The Lord he open'd the ass's mou'
The minister open'd 's ain.
He's a' wrang, &c.
The puir precentor cudna sing,
He gruntit like a swine;
The verra elders cudna pass
The ladles till his min'.
And for the rulin' elder's grace,
It wasna worth a horn;
He didna half uncurse the meat,
Nor pray for mair the morn.
He's a' wrang, &c.
And aye he gied his nose a thraw,
And aye he crookit his mou';
And aye he cockit up his ee,
And said, "Tak' tent the noo."
We leuch ahint oor loof (palm), man,
And never said him nay:
And aye he spak'—jist lat him speik!
And aye he said his say:
Ye're a' wrang, &c.
Quo' oor guidman: "The crater's daft;
But wow! he has the claik;
Lat's see gin he can turn a han'
Or only luik and craik.
It's true we maunna lippen till him—
He's fairly crack wi' pride;
But he maun live, we canna kill him—
Gin he can work, he s' bide."
He was a' wrang, &c.
"It's true it's but a laddie's turn,
But we'll begin wi' a sma' thing;
There's a' thae weyds to gather an' burn—
An' he's the man for a' thing."
We gaed oor wa's, and loot him be,
To do jist as he micht;
We think to hear nae mair o' him,
Till we come hame at nicht;
But we're a' wrang, &c.
For, losh! or it was denner-time,
The lift (firmament) was in a low;
The reek rase up, as it had been
Frae Sodom-flames, I vow.
We ran like mad; but corn and byre
War blazin'—wae's the fell!�-
As gin the deil had broucht the fire,
To mak' anither hell.
'Twas a' wrang, &c.
And by the blaze the carl stud,
Wi's han's aneath his tails;
And aye he said—"I tauld ye sae,
An' ye're to blame yersels.
It's a' your wite (blame), for ye're a' wrang—
Ye'll maybe own't at last:
What gart ye burn thae deevilich weyds,
Whan the win' blew frae the wast?
Ye're a' wrang, and a' wrang,
And a'thegither a' wrang;
There's no a man in a' the warl'
But's a'thegither a' wrang."
Before the recitation was over, which was performed with considerable spirit and truth, Annie and Dowie were listening attentively, along with Alec, who had returned to take Annie back, and who now joined loudly in the applause which followed the conclusion of the verses.