“‘I’ the mornin’ the pedlar they faund him lyin’ deid in a little wud or shaw, no far frae the hoose. An’ wi’ that up got the cry, an’ what said they but that the butler had murdert him! Sae up he was ta’en an’ put upo’ ’s trial for ’t. An’ whether the man was not likit i’ the country-side, I cannot tell,’ said the gentleman, ‘but the cry was again’ him, and things went the wrong way for him—and that though no one aboot the hoose believed he had done the deed, more than he micht hae caused his deith by pushin’ him doon the steps. An’ even that he could hardly have intendit, but only to get quit o’ him; an’ likely enough the man was weak, perhaps ill, an’ the weicht o’ his pack on his back pulled him as he pushed.’ Still, efter an’ a’—an’ its mysel’ ’at’s sayin’ this, no the gentleman, my lady—in a pairt o’ the country like that, gey an’ lanely, it was not the nicht to turn a fallow cratur oot in! ‘The butler was, at the same time, an old and trusty servan’,’ said Mr. Heywood, ‘an’ his master was greatly concernt aboot the thing. It is impossible at this time o’ day,’ he said, ‘to un’erstan’ hoo sic a thing could be—i’ the total absence o’ direc’ evidence, but the short an’ the weary lang o’ ’t was, that the man was hangt, an’ hung in irons for the deed.
“‘An’ noo ye may be thinkin’ the ghaist o’ the puir pedlar began to haunt the hoose; but naething o’ the kin’! There was nae disturbance o’ that, or ony ither sort. The man was deid an’ buried, whaever did or didna kill him, an’ the body o’ him that was said to hae killed him, hung danglin’ i’ the win’, an’ naither o’ them said a word for or again’ the thing.
“‘But the hert o’ the man’s maister was sair. He couldna help aye thinkin’ that maybe he was to blame, an’ micht hae dune something mair nor he thoucht o’ at the time to get the puir man aff; for he was absolutely certain that, hooever rouch he micht hae been; an’ hooever he micht hae been the cause o’ deith to the troublesome pedlar, he hadna meant to kill him; it was, in pairt at least, an accident, an’ he thoucht the hangin’ o’ ’im for ’t was hard lines. The maister was an auld man, nearhan’ auchty, an’ tuik things the mair seriously, I daursay, that he wasna that far frae the grave they had sent the puir butler til afore his time—gien that could be said o’ ane whause grave was wi’ the weather-cock! An’ aye he tuik himsel’ to task as to whether he ouchtna to hae dune something mair—gane to the king maybe—for he couldna bide the thoucht o’ the puir man that had waitit upo’ him sae lang an’ faithfu’, hingin’ an’ swingin’ up there, an’ the flesh drappin’ aff the banes o’ ’im, an’ still the banes hingin’ there, an’ swingin’ an’ creakin’ an’ cryin’! The thoucht, I say, was sair upo’ the auld man. But the time passed, an’ I kenna hoo lang or hoo short it may tak for a body in sic a position to come asun’er, but at last the banes began to drap, an’ as they drappit, there they lay—at the fut o’ the gallows, for naebody caret to meddle wi’ them. An’ whan that cam to the knowledge o’ the auld gentleman, he sent his fowk to gether them up an’ bury them oot o’ sicht. An’ what was left o’ the body, the upper pairt, hauden thegither wi’ the irons, maybe—I kenna weel hoo, hung an’ swung there still, in ilk win’ that blew. But at the last, oot o’ sorrow, an’ respec’ for the deid, hooever he dee’d, his auld maister sent quaietly ae mirk nicht, an’ had the lave o’ the banes ta’en doon an’ laid i’ the earth.
“‘But frae that moment, think ye there was ony peace i’ the hoose? A clankin’ o’ chains got up, an’ a howlin’, an’ a compleenin’ an’ a creakin’ like i’ the win’—sic a stramash a’thegither, that the hoose was no fit to be leevit in whiles, though it was sometimes waur nor ither times, an’ some thoucht it had to do wi’ the airt the win’ blew: aboot that I ken naething. But it gaed on like that for months, maybe years,’—Mr. Harper wasna sure hoo lang the gentleman said—‘till the auld man ’maist wished himsel’ in o’ the grave an’ oot o’ the trouble.
“‘At last ae day cam an auld man to see him—no sae auld as himsel’, but ane he had kenned whan they wur at the college thegither. An’ this was a man that had travelled greatly, an’ was weel learnt in a heap o’ things ord’nar fowk, that gies themsel’s to the lan’, an’ the growin’ o’ corn, an’ beasts, ir no likly to ken mickle aboot. He saw his auld freen’ was in trouble, an’ didna cairry his age calm-like as was nait’ral, an’ sae speirt him what was the maitter. An’ he told him the whole story, frae the hangin’ to the bangin’. “Weel,” said the learnit man, whan he had h’ard a’, “gien ye’ll tak my advice, ye’ll jist sen’ an’ howk up the heid, an’ tak it intil the hoose wi’ ye, an’ lat it bide there whaur it was used sae lang to be;—do that, an’ it’s my opinion ye’ll hear nae mair o’ sic unruly gangin’s on.” The auld gentleman tuik the advice, kennin’ no better. But it was the richt advice, for frae that moment the romour was ower, they had nae mair o’ ’t. They laid the heid in a dacent bit box i’ the cellar, an’ there it remaint, weel content there to abide the day o’ that jeedgment that’ll set mony anither jeedgment to the richt-aboot; though what pleesur could be intil that cellar mair nor intil a hole i’ the earth, is a thing no for me to say! So wi’ that generation there was nae mair trouble.
“‘But i’ the coorse o’ time cam first ane an’ syne anither, wha forgot, maybe leuch at, the haill affair, an’ didna believe a word o’ the same. But they’re but fules that gang again’ the experrience o’ their forbeirs!—what wud ye hae but they wud beery the heid! An’ what wud come o’ that but an auld dismay het up again! Up gat the din, the rampaugin’, the clankin’, an’ a’, jist the same as afore! But the meenute that, frichtit at the consequences o’ their folly, they acknowledged the property o’ the ghaist in his ain heid, an’ tuik it oot o’ the earth an’ intil the hoose again, a’ was quaiet direckly—quaiet as hert could desire.’
“Sae that was the story!
“An’ whan the lunch was ower, an’ Mr. Harper was thinkin’ the moment come whan they would order him to tak the heid, an’ him trimlin’ at the thoucht o’ touchin’ ’t, an’ lay ’t whaur it was—an’ whaur it had sae aften been whan it had a sowl intil ’t, the gentleman got up, an’ says he til him, ‘Be so good,’ says he, ‘as fetch me my hat-box from the hall.’ Harper went an’ got it as desired, an’ the gentleman took an’ unlockit it, an’ roon’ he turnt whaur he stood, an’ up he tuik the skull frae the chimley-piece, neither as gien he lo’ed it nor feared it—as what reason had he to do either?—an’ han’let it neither rouchly, nor wi’ ony show o’ mickle care, but intil the hat-box it gaed, willy, nilly, an’ the lid shutten doon upo’ ’t, an’ the key turnt i’ the lock o’ ’t; an’ as gien he wad mak the thing richt sure o’ no bein’ putten again whaur it had sic an objection to gang, up he tuik in his han’ the hat-box, an’ the contrairy heid i’ the inside o’ ’t, an’ awa’ wi’ him on his traivels, here awa’ an’ there awa’ ower the face o’ the globe: he was on his w’y to Spain, he said, at the moment; an’ we saw nae mair o’ him nor the heid, nor h’ard ever a soon’ mair o’ clankin’, nor girnin’, nor ony ither oonholy din.
“An’ that’s the trowth, mak o’ ’t what ye like, my leddy an’ maister Grant!”
Mistress Brookes was silent, and for some time not a syllable was uttered by either listener. At last Donal spoke.