A pause following, he resumed:
“Gien onything gie ye reason to prefar waitin’ till ye ken Doory an’ me a bit better, sir,” he said, “coont my ill-mainnert queston no speirt.”
“There’s naething,” answered Donal. “I’ll tell ye onything or a’thing aboot mysel’.”
“Tell what ye wull, sir, an’ keep what ye wull,” said the cobbler.
“I was broucht up a herd-laddie,” proceeded Donal, “an’ whiles a shepherd ane. For mony a year I kent mair aboot the hill-side nor the ingle-neuk. But it’s the same God an’ Father upo’ the hill-side an’ i’ the king’s pailace.”
“An’ ye’ll ken a’ aboot the win’, an’ the cloods, an’ the w’ys o’ God ootside the hoose! I ken something hoo he hauds things gaein’ inside the hoose—in a body’s hert, I mean—in mine an’ Doory’s there, but I ken little aboot the w’y he gars things wark ’at he’s no sae far ben in.”
“Ye dinna surely think God fillsna a’thing?” exclaimed Donal.
“Na, na; I ken better nor that,” answered the cobbler; “but ye maun alloo a tod’s hole ’s no sae deep as the thro’t o’ a burnin’ m’untain! God himsel’ canna win sae far ben in a shallow place as in a deep place; he canna be sae far ben i’ the win’s, though he gars them du as he likes, as he is, or sud be, i’ your hert an’ mine, sir!”
“I see!” responded Donal. “Could that hae been hoo the Lord had to rebuke the win’s an’ the wawves, as gien they had been gaein’ at their ain free wull, i’stead o’ the wull o’ him ’at made them an’ set them gaein’?”
“Maybe; but I wud hae to think aboot it afore I answert,” replied the cobbler.