‘He maun be sair at hame wi’ the bonny man!’ said Kirsty.
‘Lassie,’ said David, ‘you and me and yer mither, we hae naething left but be better bairns, and gang the fester to the bonny man!—Whaur’s what’s left o’ the laddie, Kirsty?’
‘Lyin i’ my hoose, as he ca’d it. Mine was i’ the yerd, his i’ the air, he said. He was awa afore I wan to the kitchen. He had jist killt himsel savin at Phemy, rinnin and fechtin on, upo’ the barest chance o’ savin her life; and sae whan he set off again to gang til her, no bidin for me, he was that forfouchten ’at he hed a bluid-brak in ’s breist, and was jist able, and nae mair, to creep intil the weem oot o’ the snaw. He didna like the place, and yet had a kin’ o’ a notion o’ the bonny man bein there whiles. I’m thinkin Snootie maun hae won til him, and run hame for help, for I faund him maist deid upo’ the door-step.’
David stooped and patted the dog.
‘Na, that cudna be,’ he said, ‘or he wud never hae left him, I’m thinkin.—Ye’re a braw dog,’ he went on to the collie, ‘and I’m thankfu’ yer no lyin wi yer tongue oot!—But guid comes to guid doggies!’ he added, fondling the creature, who had risen, and feebly set his paws on his knees.
‘And ye left him lyin there! Hoo hed ye the hert, Kirsty?’ sobbed the mother reproachfully.
‘Mother, he was better aff nor ony ither ane o’ ’s! I winna say, mother, ’at I lo’ed him sae weel as ye lo’ed him, for maybe that wudna be natur—I dinna ken; and I daurna say ’at I lo’e him as the bonny man lo’es his brithers and sisters a’; but I hae yet to learn hoo to lo’e him better. Onygait, the bonny man wantit him, and he has him! And whan I left him there, it was jist as gien I hield him oot i’ my airms and said, “Hae, Lord; tak him: he’s yer ain!”’
‘Ye’re i’ the richt, Kirsty, my bonny bairn!’ said David. ‘Yer mither and me, we was never but pleased wi’ onything ’at ever ye did.—Isna that true, Mar’on, my ain wuman?’
‘True as his word!’ answered the mother, and rose, and went to her room.
David sought the yard, saw that all was right with the beasts, and fed them. Thence he made his way to his workshop over the cart-shed, where in five minutes he constructed, with two poles run through two sacks, a very good stretcher, carrying it to the kitchen, where Kirsty sat motionless, looking into the fire.