'Na, na, grannie. The Napers are frien's o' his. We maunna interfere wi' them. I'll gang up mysel' ance I hae had my brakfast.'
'Weel, weel, laddie. Eh! I'm blythe to see ye! Hae ye gotten ony prizes noo?'
'Ay have I. I'm sorry they're nae baith o' them the first. But I hae the first o' ane an' the third o' the ither.'
'I am pleased at that, Robert. Ye'll be a man some day gin ye haud frae drink an' frae—frae leein'.'
'I never tellt a lee i' my life, grannie.'
'Na. I dinna think 'at ever ye did.—An' what's that crater Shargar aboot?'
'Ow, jist gaein' to be a croon o' glory to ye, grannie. He vroucht like a horse till Dr. Anderson took him by the han', an' sent him to the schuil. An' he's gaein' to mak something o' 'im, or a' be dune. He's a fine crater, Shargar.'
'He tuik a munelicht flittin' frae here,' rejoined the old lady, in a tone of offence. 'He micht hae said gude day to me, I think.'
'Ye see he was feart at ye, grannie.'
'Feart at me, laddie! Wha ever was feart at me? I never feart onybody i' my life.'