'Na,' said Robert; 'I dinna think she rises muckle afore twa o'clock the nicht. But hoo ken ye? Are ye sure o' 't? It's an awfu' thing to think o'.'
'To convence ye, I maun jist tell ye the trowth. The hoose we're in hasna a gude character. We're middlin' dacent up here; but the lave o' the place is dreadfu'. Eh for the bonnie leys o' Bodyfauld! Gin ye see my father, tell him I'm nane waur than I was.'
'They think ye droont i' the Dyer's Pot, as they ca' 't.'
'There I am again!' she said—'miles awa' an' nae time to be lost!—My lord has a man they ca' Mitchell. Ower weel I ken him. There's a wuman doon the stair 'at he comes to see whiles; an' twa or three nichts ago, I heard them lauchin' thegither. Sae I hearkened. They war baith some fou, I'm thinkin'. I cudna tell ye a' 'at they said. That's a punishment noo, gin ye like—to see and hear the warst o' yer ain ill doin's. He tellt the limmer a heap o' his lord's secrets. Ay, he tellt her aboot me, an' hoo I had gane and droont mysel'. I could hear 'maist ilka word 'at he said; for ye see the flurin' here 's no verra soon', and I was jist 'at I cudna help hearkenin'. My lord's aff the nicht, as I tell ye. It's a queer gait, but a quaiet, he thinks, nae doobt. Gin onybody wad but tell her hoo mony een the baron's made sair wi' greitin'!'
'But hoo's that to be dune?' said Robert.
'I dinna ken. But I hae been watchin' to see you ever sin' syne. I hae seen ye gang by mony a time. Ye're the only man I ken 'at I could speyk till aboot it. Ye maun think what ye can do. The warst o' 't is I canna tell wha she is or whaur she bides.'
'In that case, I canna see what's to be dune.'
'Cudna ye watch them aboord, an' slip a letter intil her han'? Or ye cud gie 't to the skipper to gie her.'
'I ken the skipper weel eneuch. He's a respectable man. Gin he kent what the baron was efter, he wadna tak him on boord.'
'That wad do little guid. He wad only hae her aff some ither gait.'