'He's generally up the stair aboot this hoor, mem—that is, whan he's no i' the parlour at 's lessons.'
'What gangs he sae muckle up the stair for, Betty, do ye ken? It's something by ordinar' wi' 'm.'
''Deed I dinna ken, mem. I never tuik it into my heid to gang considerin' aboot it. He'll hae some ploy o' 's ain, nae doobt. Laddies will be laddies, ye ken, mem.'
'I doobt, Betty, ye'll be aidin' an' abettin'. An' it disna become yer years, Betty.'
'My years are no to fin' faut wi', mem. They're weel eneuch.'
'That's naething to the pint, Betty. What's the laddie aboot?'
'Do ye mean whan he gangs up the stair, mem?'
'Ay. Ye ken weel eneuch what I mean.'
'Weel, mem, I tell ye I dinna ken. An' ye never heard me tell ye a lee sin' ever I was i' yer service, mem.'
'Na, nae doonricht. Ye gang aboot it an' aboot it, an' at last ye come sae near leein' that gin ye spak anither word, ye wad be at it; and it jist fleys (frights) me frae speirin' ae ither question at ye. An' that's hoo ye win oot o' 't. But noo 'at it's aboot my ain oye (grandson), I'm no gaein' to tyne (lose) him to save a woman o' your years, wha oucht to ken better; an sae I'll speir at ye, though ye suld be driven to lee like Sawtan himsel'.—What's he aboot whan he gangs up the stair? Noo!'