'Wasna it an ill trick o' Joseph, gran'mither, to put that cup, an' a siller ane tu, into the mou' o' Benjamin's seck?'
'What for that, laddie? He wanted to gar them come back again, ye ken.'
'But he needna hae gane aboot it in sic a playactor-like gait. He needna hae latten them awa' ohn tellt (without telling) them that he was their brither.'
'They had behaved verra ill till him.'
'He used to clype (tell tales) upo' them, though.'
'Laddie, tak ye care what ye say aboot Joseph, for he was a teep o' Christ.'
'Hoo was that, gran'mither?'
'They sellt him to the Ishmeleets for siller, as Judas did him.'
'Did he beir the sins o' them 'at sellt him?'
'Ye may say, in a mainner, 'at he did; for he was sair afflickit afore he wan up to be the King's richt han'; an' syne he keepit a hantle o' ill aff o' 's brithren.'