'Doobtless, laddie.'
'But it'll be some sair upo' them to sit there aitin' an' drinkin' an' talkin' awa', an' enjoyin' themsel's, whan ilka noo an' than there'll come a sough o' wailin' up frae the ill place, an' a smell o' burnin' ill to bide.'
'What put that i' yer heid, laddie? There's no rizzon to think 'at hell's sae near haven as a' that. The Lord forbid it!'
'Weel, but, grannie, they'll ken 't a' the same, whether they smell 't or no. An' I canna help thinkin' that the farrer awa' I thoucht they war, the waur I wad like to think upo' them. 'Deed it wad be waur.'
'What are ye drivin' at, laddie? I canna unnerstan' ye,' said Mrs. Falconer, feeling very uncomfortable, and yet curious, almost anxious, to hear what would come next. 'I trust we winna hae to think muckle—'
But here, I presume, the thought of the added desolation of her Andrew if she, too, were to forget him, as well as his Father in heaven, checked the flow of her words. She paused, and Robert took up his parable and went on, first with yet another question.
'Duv ye think, grannie, that a body wad be allooed to speik a word i' public, like, there—at the lang table, like, I mean?'
'What for no, gin it was dune wi' moedesty, and for a guid rizzon? But railly, laddie, I doobt ye're haverin' a'thegither. Ye hard naething like that, I'm sure, the day, frae Mr. Maccleary.'
'Na, na; he said naething aboot it. But maybe I'll gang and speir at him, though.'
'What aboot?'