“I weel thoucht there sud be mair intil ’t nor appeart! Ye wad fain hae the auld man’s shune, an’ mak sur o’ them afore he kickit them frae him! Ay! It’s jist like the likes o’ ye! Mine’s a place the like o’ you’s keen set efter! Ye think it’s a’ ait an’ play! Gang awa’ wi’ ye, an’ latna me see the face o’ ye again, or I s’ ca’ to them ’at ’ll tak accoont o’ ye.”
“Hoot, man!” returned Cosmo, and went on turning the ground over, “ye’re unco hard upon a neebor!”
“Neebor! ye’re no neebor o’ mine! Gang awa’ wi’ ye, I tell ye!”
“Did naebody never gie’ you a helpin’ han’, ’at ye’re sae dooms hard upo’ ane ’at needs ane?”
“Gien onybody ever did, it wasna you.”
“But dinna ye think ye’re a kin’ o’ b’un’ to du the like again?”
“Ay, to him ’at did it—but I tell ye ye’re no the man; sae gang aboot yer business.”
“Someday ye may want somebody ance mair to du ye a guid turn!”
“I hae dune a heap to gie me a claim on consideration. I hae grown auld upo’ the place. What hae ye dune, my man?”
“I wadna hae muckle chance o’ duin’ onything, gien a’ body was like you. But did ye never hear tell o’ ane ’at said: ‘Ye wad du naething for nane o’ mine, sae ye refeesed mysel’?”