Whan that Apprill with his shouris sote
And the droughte of marche hath pa'd [.y] rote
And badid euery veyne in suche licour
Of whiche vertu engendrid is the flour
Whanne zepherus eke with his sote breth
Enspirid hath in euery holte and heth
The tendir croppis and the yong sonne
Hath in the ram half his cours y conne
And smale foulis make melodie
That slepyn al nyght with opyn ye
So prikith hem nature in her corage
Than longyng folk to gon on pilgremage
And palmers to seche straunge londis
To serue halowis couthe in sondry londis
And specially fro euery shiris ende
Of yngelond to Cauntirbury thy wende
The holy blisful martir for to seke
That them hath holpyn when they were seke
And fil in that seson on a day
In Suthwerk atte tabard as I lay
Redy to wende on my pilgremage
To Cauntirbury with deuout corage
That nyght was come in to that hosterye
Wel nyne & twenty in a companye
Of sondry folk be auenture y falle
In feleship as pilgrymys were they alle
That toward Cauntirbury wolden ryde
The chambris and the stablis were wyde
And wel were they esid atte beste
Reduced Leaf in original, 7 × 10 inches
O moral Gower
Chaucer