A dream?
ELLEN
Aye. A dream’t A wis gaun in a field an’ the grass wis green, greener than life, an’ there wis coos in it and sheep-no’ dirty, blackened beasts like whit’s here, bit whit ye wid fancy they wid be some place whaur there isnae always smoke. An’ A walked in the field an’ the sun wis shinin’ an’ it cam’ dark suddent an’ A couldnae see the coos nae mair. There wis thunder an’ it frichtened me an’ whin A cam’ tae look up again, it wis rainin’ bluid on ma heid, naethin’ bit bluid, an’ the field ran rid wi’ it. Bluid everywhaur, naethin’ bit bluid.
MARY
An’ it frichtened ye? Aye, the nichtmare’s no pleasant fur ony yin. Ye ett pretty hearty last nicht. Weel, never mind. It’s a’ past noo. Ye’ll feel better efter a cup o’ tea. A’ll shune huv breakfast on the table noo.
ELLEN
A’ve dream’t yon dream afore, an’ the last time A dream’t it wis the nicht afore the big fire in the pit whin Jock’s faither got ‘imself kill’t. A’ve niver dream’t it since that nicht an’ noo it’s come again an’ ma boy’s gaun oot tae his work an’ me too late to stop ‘im.
MARY
(moves towards the door)
Mebbe it’s no’ too late.