Tell me aboot it, Auntie. Ye’ve never tell’t me hoo it happen’t.
ELLEN
Eh? Bless the lass, whit’s the use o’ that! Seems to me we’re baith o’ us a bit cracket the day. We’ve got accident on the brain.
MARY
They ay ring the bell don’t they, Auntie, when onythin’ gaes wrang?
ELLEN
No! fur an odd man an’ ‘is laddie nipped in a roof fall, jist if it’s a big thing. Look here, lass, if ye cannae talk o’ naethin’ bit accidents, ye’d better shut up. (She rises from her chair.) Whit wi’ ma dream an’ your worryin’ A don’t know where A am.
MARY
A wis jist askin’. Ye never can ken wi’ a coal-pit whin its gaun tae git nesty an’ a man cannae ay mind whaur he is whin he’s doon.