Quid celebras auratam undam, et combusta pyropis
Flumina, vel medio quæ serit æthra salo?
Æternum refluis si pernoctaret in undis
Phœbus, et incertam sidera suda Tethyn
Si colerent, tantæ gemmæ! nil cærula librem:
Sorderet rubro in littore dives Eos.
Pactoli mea lympha macras ditabit arenas,
Atque universum gutta minuta Tagum.
O caram caput! O cincinnos unda beatos
Libata! O Domini balnea sancta mei!
Quod fortunatum voluit spectare canalem,
Hoc erat in laudes area parva tuas.
Jordanis in medio perfusus flumine lavit,
Divinoque tuas ore beavit aquas.
Ah! Solyma infelix rivis obsessa prophanis!
Amisit genium porta Bethesda suum.
Hic Orientis aquæ currunt, et apostata Parphar,
Atque Abana immundo turbidus amne fluit,
Ethnica te totam cum fœdavere fluenta,
Mansit Christicolâ Jordanis unus aqua.
SERVILII FATUM, SIVE VINDICTA DIVINA.
Et sic in cithara, sic in dulcedine vitæ
Et facti et luctus regnat amarities.
Quam subito in fastum extensos atque esseda[68] vultus
Ultrici oppressit vilis arena sinu!
Si violæ, spiransque crocus: si lilium ἀέινον
Non nisi justorum nascitur e cinere:
Spinarum, tribulique atque infelicis avenæ
Quantus in hoc tumulo et qualis acervus erit?
Dii superi! damnosa piis sub sidera longum
Mansuris stabilem conciliate fidem!
Sic olim in cœlum post nimbos clarius ibunt,
Supremo occidui tot velut astra die.
Quippe ruunt horæ, qualisque in corpore vixit,
Talis it in tenebras bis moriturus homo.
FOOTNOTES:
[68] The original edition misprints essera.
DE SALMONE
Ad virum optimum, et sibi familiarius notum: D. Thomam Poellum Cantrevensem: S. S. Theologiæ Doctorem.