"'Haud on,' I says, 'till ye come tae a cross street, and dinna gang doon it, and when ye see anither pass it, but whup roond the third, and yir nose 'ill bring ye tae the Strand.'
"He was a shachlin bit cratur, and he lookit up at me.
"'Where were you born, officer?' in his clippit English tongue.
"'Drumtochty,' a' said, 'an' we hev juist ae man as sma' as you in the hale Glen.'
"He gied awa' lauchin' like tae split his sides, an' the fac' is there's no ane o' them asks me a question but he lauchs. They're a licht-headed fouk, and no sair educat. But we maunna boast; they hevna hed oor advantages."
The minister made a brave effort to assert himself.
"Is there anything I can do?" but the figure simply waved its hand and resumed:
"A'm comin' tae that, but a' thocht ye wud be wantin' ma opeenion o'
London.
"Weel, ye see, the first thing a' did, of coorse, after settlin' doon, was tae gae roond the kirks and hear what kin' o' ministers they hae up here. A've been in saxteen kirks the last three months, an' a' wud hae been in mair had it no bin for ma oors.
"Ay, ay, a' ken ye 'ill be wantin' ma judgment," interpreting a movement in the chair, "an' ye 'ill hae it. Some wes puir stuff—plenty o' water and little meal—and some wesna sae bad for England. But ye 'ill be pleased to know," here the figure relaxed and beamed on the anxious minister, "that a'm rael weel satisfied wi' yersel', and a'm thinkin' o' sittin' under ye.