"Noo this roosed ma suspicions, for it's against reason for a man tae be dividing intae classes till the end o' his sermon. Tak my word, it's no chancy when a minister begins at the tail o' his subject: he'll wind a queer pirn afore he's dune.
"Weel, he gaed up and he gaed doon, and he aye said, 'Oh yes, yes,' juist like the thrashing mill at Drumsheugh scraiking and girling till it's fairly aff, an' by-and-by oot he comes wi' his heads.
"'There are fower trumpets,' says he. 'First, a leeteral trumpet; second, a heestorical trumpet; third, a metaphorical trumpet; fourth, a speeritual trumpet.'
"'I've got ye,' a' said tae masel, and settled doon to hear him on the first head, for fear he micht hae pints; but wull ye believe me, he barely mentioned leeteral till he was aff tae speeritual, and then back tae heestorical, an' in five meenuts he had the hale fower trumpets blawing thegither.
"It wes maist exasperatin', and a' saw Jeems watchin' me—but that's naethin'.
"'There be many trumpets,' says he, 'oh yes, an' it wes a good trumpet Zaccheus heard,' and afore a' knew where a' wes he hed startit again wi' fower new heads, as if he had never said trumpet.
"'A big tree' he cries, 'an' a little man, oh yes, an' this is what we will be doin'.
"'First. We shall go up the tree wi' Zaccheus.
"'Second. We shall sit in the branches wi' Zaccheus.
"'Third. We shall come down from the tree wi' Zaccheus; and if time permits,