“Dis she gie the texts an' diveesions?” and Posty smacked his lips.
“It's no likely she wud forget that, aifter gaein' ower them ilka Sabbath nicht here sin she wes a wee bairnie. 'Faith without works is dead.' James, ye ken.”
“Ay, ay,” cried Posty, impatiently; “a testin' text; ye cudna hae a better tae jidge a a man by; hoo wes 't handled?”
“Three heads. First, 'True religion is a principle in the soul'—Posty nodded, 'that's faith.' Second, 'It is a practice in the life'—'warks.' murmured Posty. Third, 'Without a principle in the soul, there can't be a practice in the life.'”
“A' see naethin' wrang there, Mary; it's maybe no verra oreeginal, but that's naither here nor there; gin ye stand on yir head ye can aye see a new glen; it wis soond an' instructive. Did he titch on Paul and James? he wud be sure tae be reconcilin' them, gin he be ablow forty.”
“That's a' she writes on the sermon, but she gied intae the vestry wi' her lines, an' the minister wes rael kind tae her when he heard her tongue.
“His English slippit aff in a meenut, an' oot cam the auld tongue; he's a Perthshire man himsel, though frae the sooth end, an' his wife's second cousin is merried tae the minister o' Kildrummie's brother, so ye micht say he wes conneckit wi' Drumtochty.
“He telt her tae coont him a freend noo that she wes amang strangers, an' tae send for him in tribble, an' Lily declares that she gaed back that mornin' wi' her heart fu' of comfort an' gledness. So ye may tell the neeburs that Lily's daein' weel in London. She sends her respects tae Drumsheugh, and ye'ill say tae Jamie Soutar that Lily wes askin' for him.”
When Posty departed, Mary read the last part of Lily's letter slowly to herself.
“The minister's prayer took in a' kinds o' fouk, an' ae peteetion, a' thocht, wes for us, grannie: 'Remember any one about whom his friends are anxious '—and he stopped for half a meenut. Ye cud hae heard a preen (pin) fall, an' a' said tae masel, 'Chairlie.'