“It's a Providence, an' naethin' less than an answer tae prayer,” broke in Mary, in great agitation; “here hev I been murnin' that a' cudna get tae London masel, an' that a' kent naebody there, till ma heart wes weary in ma breist.
“Naethin' is sairer, Jamie, than tae ken that ane ye luve is lyin' ill amang strangers, wi' naebody o' her bluid tae speak a couthy word tae her, puir lassie, or gie her a drink. A' wes juist seein' her lyin' alane at the top of the big hoose, an' wushin' she wes wi 's a' in the Glen.”
“Posty said something aboot Lily bein' a wee sober,” Jamie remarked, with much composure, as if the matter had just come into his memory; “an' noo a' mind ye expeckit her hame for a holiday laist August. She wudna be wantin' tae traivel sae far north, a'm jalousin'.”
“Traivel!” cried Mary; “naebody cares for a long road gin it brings us hame; an' Lily wes coontin' she would come up wi' the Drumtochty fouk on the first Friday o' laist August. A' wes cleanin' up the place for a month tae hae 't snod, but she didna come, an' a'm fearin' she 'ill no be here again; a' hed a feelin' frae the beginnin' a' wud never see Lily again.
“Her letter cam on a Thursday afternoon when I was beginnin' tae air the sheets for her bed, an' when Posty gave it, I got a turn.
“Lily's no comin,' sit doon,” a' sed.
“Scarlet fever broke oot amang the bairns in the family, an' she thocht it her duty tae stay and help, for the hoose wes fu' o' nurses, an' the cairryin' wes by ordinar.”
“It wes a sacrifice,” said Jamie. “Lily never eneuch cared for hersel; the wark wud tell on her a 'll warrant.”
“Ma opeenion is that she's never got the better o' that month, an, Jamie, a' hevna likit her letters a' winter. It 's little she says aboot hersel, but she 's hed a hoast (cough) for sax months, an' a' gither her breath 's failin'.
“Jamie, a' hevna said it tae a livin' soul, but a 've hed a warnin' no langer back than laist nicht. Lily's deein', an' it wes London 'at hes killed her.