Burnbrae looked at his wife.
“Is that oor lassie's name?”
“Aye, it is. A 've sown it mony a year, but this is the first summer a' cud read it plain, and the last a 'll sow it in oor gairden; an' yon's the apple tree we planted the year she wes born, an' the blossom never wes sae bonnie as this year.
“Oh, John, a' ken we oucht tae dae what's richt, an' no deny oor principles; but a' canna leave, a' canna leave.
“It 's no siller or plenishing a'm thinkin' aboot; it's the hoose ye brocht me tae that day, an' the room ma bairns were born in, an' the gairden she played in, an' whar a' think o' her in the gloamin'.
“It 's mair than a' can bear tae pairt wi' ma hame, an' the kirkyaird, an' gang into a strange place where a' ken naebody and naebody kens us. It 'ill brak ma hert.
“Are ye fixed aboot this maitter, John?... there's no muckle difference aifter a'.... Dr. Davidson's a fine man, an' a've herd ye praise him yersel... if ye promised tae gang at a time, maybe....” And Jean touched Burnbrae timidly with her hand.
“A' want tae dee here and be beeried wi' Jeannie.”
“Dinna try me like this,” Burnbrae cried, with agony in his voice, “for the cross is heavy eneuch already withoot the wecht o' yir plead-in'.
“Ye dinna see the nicht what ye are askin', for yir een are blind wi' tears. If a' gied in tae ye and did what ye ask, ye wud be the sorriest o' the twa, for nane hes a truer hert than ma ain' wife.