Wee Macgreegor Enlists

by J. J. Bell

'Eh?'

'I couldna tell ye afore; but she had got wind o' Maggie.'

'Maggie! Oh, hell! But no frae me, Macgreegor, no frae me! Ye believe that?'

'Oh, ay.'

Willie let off sundry curses. 'But I suppose I'm to blame,' he said bitterly.

'Naebody to blame but masel'.'

'But did ye no explain to Christina? A' ye did was to canoodle wi' the wrang girl, pro tem.—a thing that happens daily. I couldna fancy a girl that naebody had ever wanted to cuddle; an' if I was a girl I couldna fancy a chap that——'

'Nae use talkin' aboot it, Wullie,' Macgregor said sadly, wearily.

'Aw, but her an' you 'll mak' it up afore ye're done. If ye dinna, I'll want to kill masel' an' Maggie forbye. A' the same, I wisht fat Maggie was here the noo. I could dae fine wi' a bit squeeze.'

'My! ye're a fair treat!' said Macgregor, chuckling in his misery.