"Ay, but I assure ye that sma' jug's for cream, an' I dinna doot mysel but 'at there's to be fowerpence worth o' milk this nicht."
"There's to be a puddin' made the morn, Leeby. Ou, ay, a' thing points to that; an' we're very sure there's nae puddins at the lawyer's on the Sabbath onless they hae company."
"I dinna ken wha they can hae, if it be na that brither o' the wife's 'at bides oot by Aberdeen."
"Na, it's no him, Leeby; na, na. He's no weel to do, an' they wouldna be buyin' cream for 'im."
"I'll run up to the attic again, an' see if there's ony stir at the lawyer's hoose."
By and by Leeby returned in triumph.
"Ou, ay," she said, "they're expectin' veesitors at the lawyer's, for I could see twa o' the bairns dressed up to the nines, an' Mistress Ogilvy doesna dress at them in that wy for naething."
"It fair beats me though, Leeby, to guess wha's comin' to them. Ay, but stop a meenute, I wouldna wonder, no, really I would not wonder but what it'll be—"
"The very thing 'at was passin' through my head, mother."
"Ye mean 'at the lad Wilkie 'll be to bide wi' the lawyer i'stead o' wi' Sam'l Duthie? Sal, am thinkin' that's it. Ye ken Sam'l an' the lawyer married on cousins; but Mistress Ogilvy ay lookit on Chirsty as dirt aneath her feet. She would be glad to get a minister, though, to the hoose, an' so I warrant the lad Wilkie 'll be to bide a' nicht at the lawyer's."