'Ay, ay, Jamie, ye're richt. Man, I fully meant to turn the bairn, but she ran by at sic a steek 'at there was nae stoppin' her. Rob'll mak an awfu' ring-ding if onything comes ower Davy.'
'Is't the litlin 'at's aye wi' Rob?'
'Ay, it's Chirsty Angus's bairn, her 'at was Rob's sister. A' her fowk's deid but Rob.'
'I've seen them i' the saw-mill thegither. It didna strick me 'at Rob cared muckle for the crittury.'
'Ou, Rob's a reserved stock, but he's michty fond o' her when naebody's lookin'. It doesna do, ye ken, to lat on afore company at ye've a kind o' regaird for yere ain fowk. Na, it's lowerin'. But if it wasna afore your time, ye'd seen the cradle i' the saw-mill.'
'I never saw ony cradle, Tammas.'
'Weel, it was unco ingenious o' Rob. The bairn's father an' mither was baith gone when Davy was nae age, an' auld Rob passed awa sune efter. Rob had it all arranged to ging to the college—ay, he'd been workin' far on into the nicht the hale year to save up siller to keep 'imsel at Edinbory, but ye see he promised Chirsty to look after Davy an' no send her to the parish. He took her to the saw-mill an' brocht her up 'imsel. It was a terrible disappointment to Rob, his mind bein' bent on becomin' a great leeterary genius, but he's been michty guid to the bairn. Ay, she's an extr'or'nar takkin dawty, Davy, an' though I wudna like it kent, I've a fell notion o' her mysel. I mind ance gaen in to Rob's, an', wud ye believe, there was the bit lassieky sitting in the airm-chair wi' ane o' Rob's books open on her knees, an' her pertendin' to be readin' oot in't to Rob. The tiddy had watched him readin', ye un'erstan', an', man, she was mimickin' 'im to the life. There's nae accountin' for thae things, but ondootedly it was attractive.'
'But what aboot a cradle?'
'Ou, as I was sayin', Rob didna like to lat the bairn oot o' his sicht, so he made a queer cradle 'imsel, an' put it ower the burn. Ye'll mind the burn rins through the saw-mill? Ay, weel, Davie's cradle was put across't wi' the paddles sae arranged 'at the watter rocked the cradle. Man, the burn was juist like a mither to Davy, for no only did it rock her to sleep, but it sang to the bairn the hale time.'
'That was an ingenious contrivance, Tammas; but it was juist like Rob Angus's ind'pendence. The crittur aye perseests in doin' a'thing for 'imsel. I mind ae day seein' Cree Deuchars puttin' in a window into the saw-mill hoose, an' Rob's fingers was fair itchin' to do't quick 'imsel; ye ken Cree's fell slow? "See haud o' the potty," cries Rob, an' losh, he had the window in afore Cree cud hae cut the glass. Ay, ye canna deny but what Rob's fearfu' independent.'