March 23, 1775.'

DIPLOMA.

'CANCELLARIUS, Magistri, et Scholares Universitatis Oxoniensis omnibus ad quos presentes Literae pervenerint, salutem in Domino Sempiternam.

'SCIATIS, virum illustrem, SAMUELEM JOHNSON, in omni humaniorum literarum genere eruditum, omniumque scientiarum comprehensione felicissimum, scriptis suis, ad popularium mores formandos summá verborum elegantiá ac sententiarum gravitate compositis, ita olim inclaruisse, ut dignus videretur cui ab Academiá suá eximia quaedam laudis praemia deferentur [deferrentur] quique [in] venerabilem Magistrorum Ordinem summá cum dignitate cooptaretur:

'Cum verò eundem clarissimum virum tot posteà tantique labores, in patriá praesertim linguá ornandá et stabiliendá feliciter impensi, ita insigniverint, ut in Literarum Republicá PRINCEPS jam et PRIMARIUS jure habeatur; Nos CANCELLARIUS, Magistri, et Scholares Universitatis Oxoniensis, quo talis viri merita pari honoris remuneratione exaequentur, et perpetuum suae simul laudis, nostraeque ergà literas propensissimae voluntatis extet monumentum, in solenni Convocatione Doctorum et Magistrorum Regentium, et non Regentium, praedictum SAMUELEM JOHNSON Doctorem in Jure Civili renunciavimus et constituimus, eumque virtute praesentis Diplomatis singulis juribus, privilegiis et honoribus, ad istum gradum quà quà pertinentibus, frui et gaudere jussimus. In cujus rei testimonium commune Universitatis Oxoniensis sigillum praesentibus apponi fecimus.

'Datum in Domo nostrae Convocationis die tricesimo Mensis Martii, Anno
Domini Millesimo septingentesimo, septuagesimo quinto[976].'

'Viro Reverendo Thomae Fothergill, S.T.P. Universitatis Oxoniensis Vice-Cancellario.

'S. P. D.

'Sam Johnson.

'MULTIS non est opus, ut testimonium quo, te praeside, Oxonienses nomen meum posteris commendârunt, quali animo acceperim compertum faciam. Nemo sibi placens non laetatur[977]; nemo sibi non placet, qui vobis, literarum arbitris, placere potuit. Hoc tamen habet incommodi tantum beneficium, quod mihi nunquam posthâc sine vestrae famae detrimento vel labi liceat vel cessare; semperque sit timendum, ne quod mihi tam eximiae laudi est, vobis aliquando fiat opprobrio. Vale[978].'