"Tut, gudeman, what does the sheep mind an auld creeping body like me? I hae done nae ill to your pickle sheep; and as for ganging back the road I cam, I'll do that whan I like, and no till than."
"But I'll make you blithe to turn back, auld vagabond! Do ye imagine I'm gaun to hae a' my clippers and grippers, buisters and binders, laid half idle, gaffing and giggling wi' you?"
"Why, then, speak like a reasonable man, and a courteous Christian, as ye used to do, and I'se crack wi' yoursell, and no gang near them."
"I'll keep my Christian cracks for others than auld Papist dogs, I trow."
"Wha do ye ca' auld Papist dogs, Mr Adamson?—Wha is it that ye mean to denominate by that fine-sounding title?"
"Just you, and the like o' ye, Pate. It is weel kenn'd that ye are as rank a Papist as ever kissed a crosier, and that ye were out in the very fore-end o' the unnatural Rebellion, in order to subvert our religion, and place a Popish tyrant on the throne. It is a shame for a Protestant parish like this to support ye, and gie you as liberal awmosses as ye were a Christian saint. For me, I can tell you, ye'll get nae mae at my hand; nor nae rebel Papist loun amang ye."
"Dear sir, ye're surely no yoursell the day? Ye hae kenn'd I professed the Catholic religion these thretty years—it was the faith I was brought up in, and that in which I shall dee; and ye kenn'd a' that time that I was out in the Forty-Five wi' Prince Charles, and yet ye never made mention o' the facts, nor refused me my awmos, till the day. But as I hae been obliged t'ye, I'll haud my tongue; only, I wad advise ye as a friend, whenever ye hae occasion to speak of ony community of brother Christians, that ye will in future hardly make use o' siccan harsh terms. Or, if ye will do't, tak care wha ye use them afore, and let it no be to the face o' an auld veteran."
"What, ye auld profane wafer-eater, and worshipper of graven images, dare ye heave your pikit kent at me?"
"I hae heaved baith sword and spear against mony a better man; and, in the cause o' my religion, I'll do it again."
He was proceeding, but Adamson's choler rising to an ungovernable height, he drew a race, and, running against the gaberlunzie with his whole force, made him fly heels-over-head down the hill. The old man's bonnet flew off, his meal-pocks were scattered about, and his mantle, with two or three small fleeces of wool in it, rolled down into the burn.