"Na, na, Bessie, it isna the estate that has finished the Sprots, but the Sprots that hae finished the estate, and themsells into the boot. They hae been a wicked and degenerate race, and aye the langer the waur, till they hae reached the utmost bounds o' earthly wickedness; and it's time the deil were looking after his ain."
"Ah, Wattie Blythe, ye never said a truer say. And that's just the very point where your story ends, and mine begins; for hasna the deil, or the fairies, or the brownies, ta'en away our Leddy bodily! and the haill country is running and riding in search o' her; and there is twenty hunder merks offered to the first that can find her, and bring her safe back. They hae ta'en her away, skin and bane, body and soul, and a', Wattie!"
"Hech-wow! but that is awsome! And where is it thought they have ta'en her to, Bessie?"
"O, they hae some guess at that frae her ain hints afore. It is thought they hae carried her after that Satan of a creature, wha wrought sae muckle wae about the house. It is for him they are a' looking, for they ken weel, that where they get the tane they will get the tither."
"Whew! Is that the gate o't, Bessie? Why, then, the awfu' story is nouther mair nor less than this, that the Leddy has made a 'lopement, as they ca't, and run away after a blackguard jotteryman. Hech-wow! wae's me for human frailty! But that's just the gate! When aince the deil gets in the point o' his finger, he will soon have in his haill hand. Ay, he wants but a hair to make a tether of, ony day! I hae seen her a braw sonsy lass; but even then I feared she was devoted to destruction, for she aye mockit at religion, Bessie, and that's no a good mark of a young body. And she made a' its servants her enemies; and think you these good men's prayers were a' to blaw away i' the wind, and be nae mair regarded? Na, na, Bessie, my woman, take ye this mark baith o' our ain bairns and ither folk's—If ever ye see a young body that disregards the Sabbath, and makes a mock at the ordinances o' religion, ye will never see that body come to muckle good.—A braw hand our Leddy has made o' her gibes and jeers at religion, and her mockeries o' the poor persecuted hill-folk!—sunk down by degrees into the very dregs o' sin and misery! run away after a scullion!"
"Fy, fy, Wattie, how can ye say sae? It was weel kenn'd that she hatit him wi' a perfect and mortal hatred, and tried to make away wi' him mae ways nor ane."
"Aha, Bessie; but nipping and scarting is Scots folk's wooing; and though it is but right that we suspend our judgments, there will naebody persuade me if she be found alang wi' the creature, but that she has run away after him in the natural way, on her twa shanks, without help either frae fairy or brownie."
"I'll never believe sic a thing of ony woman born, let be a leddy weel up in years."
"Od help ye, Bessie! ye dinna ken the stretch o' corrupt nature. The best o' us, when left to oursells, are nae better than strayed sheep, that will never find the way back to their ain pastures; and of a' things made o' mortal flesh, a wicked woman is the warst."
"Alack-a-day! we get the blame o' muckle that we little deserve. But, Wattie, keep ye a geyan sharp look-out about the cleuchs and the caves o' our hope; for the Leddy kens them a' geyan weel; and gin the twenty hunder merks wad come our way, it might gang a waur gate. It wad tocher a' our bonny lasses."