Corby first laid back one ear and then the other, which Charlie took for a kind answer; and, patting his mane, he continued: "Na, na, Corby; I ken ye hae nae ill designs; but only ye ken ye like a little mischief, an' a bit splutter now an' than."
"That minds me o' the story o' Janet Sandilands an' her son Jock," said Gibby Jordan the philosopher, "when he ruggit her hair, an' raive her bussing. 'That callant sude hae his hide threshed for lifting his hand to his mother,' said one: 'Na, na,' quo Janet, 'he maunna be threshed; Jock has nae ill in his mind, only he likes a tulzie.' She that wad hae a close cog sude keep a hale laiggen, Yardbire; for as the auld saying rins, 'Lippen to a Corby, an' he'll pike out your een.'"
"Shame fa' me gin I see the drift o' your philosophy, Peatstacknowe; but as I'm sure it is weel meant, it sanna be ill ta'en. Corby an' me's twa auld friends, an' we hae a great deal to lippen to ane another. But I wish we had this unsonsy job ower, laird—we're gaun on kittle ground."
"It minds me something o' the fisher that ran away after the Willy-an'-the-wisp," said Jordan: "It's a lang story, but it's weel wordy the hearing."
"If it be a very lang story, we might as weel crack about something else," said Charlie. "My heart's unco muckle turned on this daft job o' prying into the time that's to come, an' on what we're to say to the warlock. Gude saif us, laird, wha's to be the speaker? I wish that fleysome job maunna light on you? For you see, gin we set the deil's Tam to address him, he'll put him mad at the very first. The poet can bring out naething but rhames o' high flown nonsense; an' for mysel, I'm an unco plain matter-o'-fact man, an' better at good straiks than good words. Sae that the matter maun lie atween you an' the friar. What say you to this, Peatstacknowe?"
"Gude troth, Yardbire, an the task light on either of us, it may weel bring me in mind o' the laird o' Glencarthon, when he stack i' the midden at Saint Johnston, an' tint himsel i' the dark entry. The laird, you see, he comes to the door of a sow-house, an' calls out, 'Good people within there, can you tell me the way to the Queen's hostlery?' 'Oogh?' cried the auld sow. The laird repeated his question quite distinctly, which disturbing some o' the pigs, they came to the back o' the door an' fell a murmuring an' squeaking. 'What do you say?' said the laird in his turn: 'I'll thank you if you will not just speak so vehemently.' The pigs went on. 'Oh, I hear you speak Erse in this house,' said the laird; 'but, no matter: thank you for your information, I will try to work my way.' Now you see, Yardbire, like draws aye to like; an' for the friar, wi' his auld warld says, or me, to address the great Master, it wad be a reversing o' nature an' the very order of things. I hae nae hope o' our good success at a', an it warna for that bonnie Delany. If he's a man, an' no just an incarnate deil, he will be delightit wi' her."
"I wish we had her safely at him, laird," said Charlie; "for, troth, do ye see, thae chaps hing about her, an' look at her as gin they wadna care to eat her."
"She brings me amind o' a weelfaurd dink gimmer that wench," said Jordan, "that I aince saw gaun up Sowerhopeburn. There was a tichel o' wallidraggle tup hoggs rinning after her, an' plaguing her, till I was just grieved for the poor beast. At length down there comes a wheel-horned ram, the king o' the flock, an' he taks up his station by the side o' the bonny thing, an' than a' the young ranigalds slinkit away as their noses had been blooding. Then the bonny she thing got peace, for whenever ony o' the rascallions began to jee up his lug, an' draw near her, ae glent o' the auld fellow's ee stoppit him short. Now, Yardbire, I trow it is a shame to see a pretty maid jaumphed an' jur-mummled in that gate: if you will just ride close up to the tae side o' her, I'll tak up the tither, an' we'll gar them keep a due distance. There's nane o' them dares shoulder you aside."