"'Daddy say mus'n'.'
"B'er Rabbit open 'e mout'. 'E say:
"'See me long sha'p toof? 'E bite you troo un troo!'
"Lil gal skeer; 'e tu'n loose de gett un fly. B'er Rabbit gone! Ole Màn come bahk; 'e ahx 'bout B'er Rabbit. Lil gal say:
"''E done gone, daddy. I shed da gett, I hol' um fas'. B'er Rabbit bin show 'e toof; 'e gwan fer bite-a me troo un troo. I git skeer', daddy.' Màn ahx:
"'How 'e gwin fer bite you troo un troo, wun 'e toof fix bite grass? B'er Rabbit tell one big tale. 'E no kin bite-a you. Wun 'e come 'g'in, you shed dem gett, you hol' um tight, you no le'm go pas' no mo'.' Lil gal say yasser.
"Nex' day mawnin', Màn go 'long 'bout 'e wuk. Lil gal, 'e play 'roun', un 'e play 'roun'. B'er Rabbit, 'e is come tippy-tippy. 'E fine gett open; 'e slip in da geerden. 'E chew dem pea, 'e gnyaw dem pea; 'e eat tel dem pea tas'e bad. Dun 'e try fer go out; gett shed fas'. 'E no kin git troo. 'E push, gett no open; 'e keek wit' um fut, gett no open; 'e butt wit' um head, gett no open. Dun 'e holler:
"'Lil gal, lil gal! come y-open da gett. 'E berry bad fer fool wit' ole màn lak me. I no kin hol' me feelin' down wun you is do lak dis. 'E berry bad.'
"Lil gal hol' 'e head down; 'e no say nuttin'. B'er Rabbit say:
"'Be shame, lil gal, fer do ole màn lak dis. Me feelin' git wusser. Come y-open de gett 'fo' I is teer um down.'