"Sma't bud, 'e say:—
"'Less we try see fer how long tam we is kin go 'dout bittle un drink.'
"Fool bud, 'e 'tretch 'e neck, 'e toss 'e head; 'e say:—
"'All-a right; me beat-a you all day ebry day. Me beat-a you all da tam.'
"Sma't bud, 'e say:—
"'Ef you bin 'gree wit' dis, less we tek we place. You git 'pon da crik-side en tekky one ho'n, I git 'pon da tree y-up dey, en tekky nurrer ho'n. Less we 'tan' dey-dey tel we see how long tam we is kin do 'dout bittle en drink. Wun I blow 'pon me ho'n dun you blow 'pon you' ho'n fer answer me; me blow, you blow, dun we bote blow.'
"Fool bud walk 'bout big; 'e say:—
"'Me will do um!'
"Nex' day mornin' come. Da sma't bud bin tekky one ho'n un fly 'pon da tree. De fool bud bin tekky one nurrer ho'n en set by da crik-side. Dey bin sta't in fer starf deyse'f. Da fool bud, 'e stay by da crik-side wey dey bin no'n 't all fer eat; 'e no kin fin' no bittle dey-dey. Sma't bud git in da tree da y-ant en da bug swa'm in da bark plenty. 'E pick dem ant, 'e y-eat dem ant; 'e pick dem bug, 'e y-eat dem bug. 'E pick tel 'e craw come full; he feel berry good.
"Fool bud, 'e down by da crik-side. 'E set down, 'e come tire'; 'e 'tan' up, 'e come tire'; 'e walk 'bout, 'e come tire'. 'E 'tan' 'pon one leg, he 'tan' 'pon turrer; 'e pit 'e head need 'e wing; still he come tire'. Sma't bud shed 'e y-eye; 'e feel berry good. Wun 'e come hongry, 'e pick ant, 'e pick bug, tel 'e hab plenty, toze dinner-time 'e pick up 'e ho'n, 'e toot um strong—