Ansure.—The God that creatted heavin and earth, and all that thairin is, preserve me fra seduceing; and I dread otheris many under the cullour of godlynes ar seduceid, and thinkis that thei do God a pleasur, when thei persecute ane of thame that professes his name. What that man is of the law we know nott: we hear nane of his flatterie: his mensworne aith of apostasie is ignorant to us. But yf he had maid ane unlefull aith, contrair Goddis command, it war bettir to violate it then to observe it. He preaches nathing to us but the Evangell. Giff he wald otherwiese do, we wold nott beleve him, nor yitt ane angell of heavin. We hear him sawe na schismes nor divisiones, but sic as may stand with Goddis word, whilk we shall caus him confesse in presence of your Lordschip and the Clargie, when ye requyre us thairto. And as to it that hes bein condempned be the Generall Counsallis, we traist ye knaw weall that all the Generall Counsalles hes bein at diversitie amanges thame selfis, and never twa of thame universallie aggreing in all pointis, in samekle as thei ar of men. But the Spreit of veritie that bearis testimony of our Lord Jesus hes nott, nether can not, err; "for heavin and earth shall perishe or ane jote of it perishe." By this, my Lord, nether teaches he, nether will we accept of him, but that whilk aggreis with Goddis synceir word, sett furth be Patriarkis, Prophetis, Apostles, and Evangelistis, left to our salvatioun in his expresse word. And swa, my Lord, to condempne the doctrin not examinat is not requyred; for when your Lordschip pleassis to hear the confessioun of that manis faith, the maner of his doctrin, which aggreis with the Evangell of Jesus Christ, I will caus him to assist to judgement, and shalbe present thairat with Goddis pleasur, that he may rander recknyng of his beleve and our doctrin, to the superiour-poweris, according to the prescriptioun of that blood of the eternall Testament, seilled be the immaculate Lambe, to whome, with the Father, and the Holy Spreit, be all honour and glorie, for ever and ever. Amen.
4. The Ferd Article puttis me in remembrance, how dangerous it is, gif the authoritie wald putt at me and my House, according to civile and cannon lawes, and our awin municipale lawis of this Realme, and how it appeareth to the decay of our house.
Ansure.—All lawis ar (or at the least should be) subject to Goddis law, whilk law should be first placed and planted in everie manes hearte; it should have na impediment: men should not abrogat it for the defence and upsetting of thare awin advantage. Gif it wald please Authorities to put at our housse, for confessing of Goddis word, or for mantenance of his law, God is mychtie yneuch in his awin caus: He should be rather obeyed nor man. I will serve my Princess with bodye, harte, goodis, strenth, and all that is in my power, except that whilk is Goddis dewitie, quhilk I will reserve to him self alone: That is, to wirschipe him in trewth and veritie, and als near as I can, conforme to his prescrived worde, to his awin honour and obedience of my Princess.
5. The Fyft Article puttis me in remembrance how wa your Lordschip wald be to hear, see, or know any displeasur that mycht come to me, my sone, or any of my house, and speciallie in my tyme and dayis, and als to hear the great and evill bruyte of me that should now in my aige in a maner begyn to warie fra[719] my faith, and to be altered thairin, when the tyme is, that I should be maist suir and firme thairin.
Ansure.—Youre Lordschippis gud will is ever maid manifest to me in all your Articles, that wald not hear, see, or knaw my displeasur, for the quhilkis I am bound to rander your Lordschip thankis, and shall do the samyn assuredly. But as for wavering in my faith, God forbyd that I should sa do; for I beleve in God the Father, Almyghtie maikar of heavin and earth, and in Jesus Christ his onlie Sone our Salveour. My Lord, I vary not in my faith; bot I praise God that of his goodnes now in my latter dayis hes of his infinit mercy oppynned his bosome of grace to me, to acknawledge him the Eternall Wisedome, his Sone Jesus Christ, my omnisufficient satisfactioun to refuise all maner of idolatrie, superstitioun, and ignorance, whairwyth I haif bein blynded in tymes bygane, and now belevis that God wilbe mercyfull to me, for now he hes declared his blessed will clearlie to me, befoir my departing of this transitorie lyiff.
6. The Sext Article declaired that thare ar delationis of syndrie pointis of heresye upoun that man, called Dowglas or Grant, whilk lyes to your charge and conscience to putt remeady to, or ellis that all the pestilentiouse doctrin he sawis, and all whome he corruptes with his seid, wilbe requyred at your handis, and all whome he drawes fra your Christiane faith; and yf ye should thole him, that ye wilbe accused for all thame whome he infectes with heresey; and tharefoir to regard your Lordschippis honour and conscience heirintill.
Ansure.—What is his surname I knaw nott, but he calles him self Dowglas;[720] for I know nother his father nor his mother. I have heard him teache na Articles of heresye; bot that quhilk aggreis with Goddis word; for I wold manteane na man in heresey or errour. Your Lordschip regardis your conscience in the punishement thairof. I pray God that ye sua do, and examyn weall your conscience. He preaches aganis idolatrie: I remit to your Lordschippis conscience yf it be heresye or not. He preaches aganis adulterie and fornicatioun: I referr that to your Lordschippis conscience. He preaches aganis hypocrisye: I referr that to your Lordschippis conscience. He preaches aganis all maner of abuses and corruptioun of Christes synceir religioun: I refer that to your Lordschippis conscience. My Lord, I exhorte yow, in Christis name, to wey all thir effaris in your conscience,[721] and considder yf it be your dewitie also, not only to thole this, but in lyk maner to do the same. This is all, my Lord, that I varye in my aige, and na uther thing, but that I knew nott befoir these offenses to be abhominable to God, and now knowing his will be manifestatioun of his word, abhorres thame.
7. The Sevint Article desyres me to way thir materis in maist hartlie maner, and to tack thame in best parte, for the weall of bayth our consciences, my Hous, freindis, and servandis, and to put sic ane man out of my cumpany, for feir of the cummer and bruyt that should follow thairupoun, be reasson he is dilated of sindry hereseyis: and that your Lordschip wald be sory to hear ony of our servandis delated or bruited for sic caussis, or for halding of any sic men; and that your Lordschip wald understand my ansuer hearintill, or ony summondis passed thairupoun.
ANSURE.—I thank your Lordschip greatlie that ye ar so solist for the weall of me and my House, and is sa humane as to maik me the advertisment befoir ye have summoned, of your awin good will and benevolence; and hes weyed thir materis, als heychtlie as my judgement can serve me, bayth for your Lordschippis honour and myn. And when I have reassoned all that I can do with my self in it, I think it ay best to serve God, and obey his manifest word, and nott be obstinat in his contrarie: syne to give thare dew obedience to our Princes, rewllaris, and magistratis, and to hear the voce of Goddis propheittis, declairing his good promisses to thame that reapentis, and threatnyng to obstinat wicked doaris, everlesting destructioun. Your Lordschip knawis weall the man: he hes spoking with your Lordschip: I thought yow content with him. I heard na occasioun of offence in him. I can nott weall want him, or some preachar. I can nott put away sic ane man, without I knew him ane offendar, as I know nott; for I hear nothing of him, but sic as your Lordschippis self heard of him, and sick as he yitt will professe in your presence, whenever your Lordschip requires. Sic ane man that is readdy to assist him self to judgement, should not be expelled without cognitioun of the cause; for lyik as I answered befoir in ane other Article, when your Lordschip pleassis that all the spirituall and temporall men of estaite in Scotland beis convened, I shall caus him render ane accompt of his beleve and doctrin in your presences: Then gif he deserves punishment and correctioun, lett him so suffer; give he be found faythfull, lett him leve in his faith.
8. The Aucht Article proponis to me, that your Lordschip wald tack the laubour to gett me a man to instruct me in your Catholick faith, and to be my preachear, for whais doctrine ye wald lay your saule, that he wald teach nathing but trewly conforme to your faith.